Her 100 Cerdd

#100 Y Ganfed Gerdd

Eurig Salisbury — Thu, 04 Oct 2012 22:55:35 +0000

Heddiw’n grwn croniclwn ni’r
Hysterics i greu stori.

I bedwar ban o’n hannedd
Drwy’r byd heb symud o’n sedd.

Ar dramp aed i droedio’r we
A’r hewl ar goll yn rhywle.

Diolch gan lu’r canu caeth
I’n holl noddwyr llenyddiaeth!

Wedi ei chyd-gyfansoddi gan feirdd Her 100 Cerdd

#98 Talwrn Ysgol y Preseli

Eurig Salisbury — Thu, 04 Oct 2012 22:45:14 +0000

Yng nghesel y Preseli – yn y mawn
Ac mewn yn y trefi,
Yn eich iaith a welwch chi
Ŵyl wahanol eleni?

@LlenCymru #her100cerdd cais am gerdd – talwrn y beirdd yn digwydd yn Ysgol y Preseli ar y 12fed o Hydref! Gawn ni gerdd pliiis? Diolch x—
Sara Watkins (@sarawatkins96) October 04, 2012

#97 Wythnos y Glas i fyfyrwyr newydd

Hywel Griffiths — Thu, 04 Oct 2012 22:37:46 +0000

(i Greta)

Yn iaith wâr y ddarlith ddwys – ym Medi
Heb amodau ‘cytbwys’,
Heno cewch dorri eich cwys
yn barêd dros baradwys.

#96 I Jac a Iona ar eu Priodas Ruddem

Eurig Salisbury — Thu, 04 Oct 2012 22:28:09 +0000

Ar ras i Bant-glas mae’r glêr – fel erioed,
Fel rhyw haid am swper,
Ond yntau’r mab o Aber
A’i fawl o hyd yn aflêr.

Mae’r ŵyr yn hwyr â’i eiriau – fel erioed,
Yn flêr iawn ei odlau,
Ond mae’n ffaith – am unwaith mae
Ei dôn yn un â’i dannau!

Torrwch i Jac y gacen – a chanwch
I Iona yn llawen,
Mae pawb yma gyda gwên
A’u nai yn llawn o awen!

Jac a Iona’n y canol – a’r teulu’n
Reit dalog yn canmol,
Dewch, dawnsiwch heno bobol
Dan wers y dyn ar y stôl.

Ddeugain mlynedd i heddiw – fe’u hunwyd
A’u cyfannu’n unlliw,
Ymwroli’n amryliw,
I’r ffrind a’r hoff heno’n driw.

Boed hapusrwydd a llwyddiant – ichi’ch dau,
Ewch o’ch dydd i’ch haeddiant,
A rhoi yma’n llawn rhamant
Un cwrs at yr hanner cant!

#95 Merch ar goll (II)

Osian Rhys Jones — Thu, 04 Oct 2012 22:09:19 +0000

Mae’r bedwaredd noson fel blanced drosom
yn hydrefol a gwlyb, yn dwyn ein hanadl
o’r ffroenau dig,
y paderau tawel a’r fflamau gwan;
bydd amenio cyn cyrraedd bonyn y cwyr,
er bod hwnnw bron â bod wedi’i fwyta’n llwyr.

#99 Harri a Gwion

Iwan Rhys — Thu, 04 Oct 2012 22:50:35 +0000

(fy neiaint)

Y mae Harri a Gwion
yn dod o hyd fel dwy don
i’n traeth, ac anturiaethau
a ddaw o nunlle i’r ddau.

Eu dwy wên ddrwg a’u gwg wych
a fynnaf weld yn fynych
yn y Bwthyn gobeithiol
sy’n ffau i’r ddau ar y ddôl.

Dau frawd glân hoff o lanast
ond dau frawd a dyf ar hast.

#94 Rough Guide i Sir y Fflint

Hywel Griffiths — Thu, 04 Oct 2012 21:36:37 +0000

Shotton a Garden City – Eryrys
a gororau Cymru,
Maes Brychdyn a Sychdyn sy’,
A Nannerch o ran hynny.

#93 Hyddgen

Hywel Griffiths — Thu, 04 Oct 2012 21:14:29 +0000

Pan fo’r fawnog dan glogyn
A’r cymylau’n garpiau gwyn,
A lonydd dros Bumlumon
Yn barhad o’r nentydd, bron,
I droedio draw drwy y drain,
Yno daw catrawd Owain
At yr Hyddgen sy’n denu
beirdd y wlad mewn dillad du.

#92 Llandudoch

Iwan Rhys — Thu, 04 Oct 2012 21:13:50 +0000

O Baris, Seoul, Aber-soch, o’r Gwbert,
Caergybi, Rhos Rannoch,
o hyd y mae Llandudoch
yn bell lle bynnag y boch.

#91 Ar Enedigaeth Erin Medi

Eurig Salisbury — Thu, 04 Oct 2012 20:55:12 +0000

Er oered, hired yr ha’ – yn Nefyn,
Yn Nheifi, mi wela’
O bell fod pethau’n gwella
Am fod Erin Medi ‘ma.

@eurig Beth am gerdd i ferch fach Hawys ac Owain, Erin Medi?—
AE (@ApEmrys) October 04, 2012